சென்னை: தமிழகத்தில் எஸ்.ஐ.ஆர். (வாக்காளர் பட்டியல் சிறப்பு தீவிர திருத்தம்) பணியின் போது லட்சக்கணக்கான வாக்காளர்களின் பெயர்கள் நீக்கப்பட்டதாக கூறப்படும் விவகாரத்தில், காங்கிரஸ் தலைவர் ராகுல் காந்தி இதுவரை மவுனம் காப்பது ஏன் என தி.மு.க. செய்தித் தொடர்பாளரும் வழக்கறிஞருமான சரவணன் பகிரங்கமாக கேள்வி எழுப்பியுள்ளார்.
டில்லியில் நேற்று ராகுல் காந்தி உள்ளிட்ட காங்கிரஸ் தலைவர்கள், தலைமை தேர்தல் கமிஷனர் ஞானேஷ் குமார் பதவி விலக வேண்டும் என்றும், எஸ்.ஐ.ஆர். பணிகளில் நடந்ததாக கூறப்படும் முறைகேடுகளை கண்டித்தும் போராட்டம் நடத்திய பின்னணியில் இந்த விமர்சனம் வந்துள்ளது.
சமூக வலைதளப் பதிவில் சரவணன், தமிழகத்தில் நடந்ததாக கூறப்படும் வாக்காளர் பெயர் நீக்கங்கள் குறித்து ராகுல் ஏன் வாய் திறக்கவில்லை என்றும், அவரது நிலைப்பாடு என்ன என்றும் கேள்வி எழுப்பினார். மேலும், எஸ்.ஐ.ஆர். முடிந்த பின் புதிதாக தேர்ந்தெடுக்கப்பட்ட அனைத்து மாநில அரசுகளையும் கலைத்து, ஓட்டுச்சீட்டு முறையில் தேர்தல் நடத்த வேண்டும் என்ற காங்கிரஸ் தலைவர் மல்லிகார்ஜுன கார்கே கருத்தை ராகுல் ஆதரிக்கிறாரா இல்லையா என்பதை தெளிவுபடுத்த வேண்டும் என்றும் கூறினார்.
மேலும், காங்கிரசின் கூட்டணி கட்சியான த.வெ.க. மற்றும் அதன் தலைவர், முதல்வர் விஜய்க்கு பயந்து தான் தமிழக எஸ்.ஐ.ஆர். விவகாரத்தில் பேச ராகுல் தயங்குகிறாரா எனவும், இது “இரட்டை வேடம்” எனவும் அவர் குற்றம்சாட்டினார்.
