பெரம்பூர் மற்றும் திருச்சி கிழக்கு சட்டசபை தொகுதிகளில் முதல்வர் விஜய் வெற்றி பெற்றதை எதிர்த்து தொடரப்பட்ட தேர்தல் வழக்குகள் தொடர்பாக, சென்னை உயர்நீதிமன்றம் செவ்வாய்க்கிழமை முக்கிய கேள்விகளை எழுப்பியது.
இந்த வழக்குகள் திமுக வேட்பாளர்கள் மற்றும் சில வாக்காளர்கள் தரப்பில் தாக்கல் செய்யப்பட்டவை. இவை தற்போது உயர்நீதிமன்றத்தில் விசாரணையில் உள்ள நிலையில், தேர்தல் வழக்குகளைத் தள்ளுபடி செய்யக் கோரி விஜய் தரப்பில் மனு தாக்கல் செய்யப்பட்டுள்ளது.
விசாரணையின் போது நீதிபதி லக்ஷ்மிநாராயணன், சொத்து விவரங்களை தாக்கல் செய்யும்போது பலரும் சார்ட்டர்ட் அக்கவுண்டண்ட் மீது நம்பிக்கை வைத்து செயல்படுவதாகக் குறிப்பிட்டார். தானும் நீதிபதியாகிய பிறகு சொத்து விவரங்களை சமர்ப்பித்தபோது தனது சார்ட்டர்ட் அக்கவுண்டண்டை நம்பித்தான் செய்ததாகவும் அவர் கூறினார்.
சொத்து விவரங்களில் ரூ.20–30 லட்சம் அளவில் ஏதேனும் விடுபாடு அல்லது தவறு இருந்தால், அது ஆடிட்டர் செய்த தவறாக இருந்தாலும், அதையே மட்டும் வைத்து தேர்தலை செல்லாது என அறிவிக்க முடியுமா என நீதிமன்றம் மனுதாரர் தரப்பு வழக்கறிஞரிடம் கேள்வி எழுப்பியது. மேலும், திரையுலகில் சூப்பர் ஸ்டாராக இருந்த ஒருவர் ரூ.600 கோடிக்கும் மேற்பட்ட சொத்துகளை வெளிப்படையாகக் குறிப்பிட்ட நிலையில், குறைந்த அளவிலான விடுபாடு தேர்தல் வெற்றியை எவ்வாறு பாதிக்கும் என்றும் நீதிபதி சுட்டிக்காட்டினார்.
இந்தக் கேள்விகள் முன்வைக்கப்பட்ட நிலையில், வழக்குகள் தொடரத் தகுந்த காரணங்கள் உள்ளனவா என்பதையும் நீதிமன்றம் தொடர்ந்து பரிசீலித்து வருகிறது.
