எலான் மஸ்க்கின் ஸ்டார்லிங்க் இந்தியாவில் சேவை தொடங்குவது தொடர்பான விவாதம் தீவிரமடைந்துள்ள நிலையில், நாட்டின் பாதுகாப்பில் எந்த சூழலிலும் சமரசம் செய்ய முடியாது என்று மத்திய அமைச்சர் ஜோதிராதித்யா சிந்தியா தெரிவித்தார்.
பாதுகாப்பு காரணங்களை முன்வைத்து இந்திய அரசு அனுமதி மறுக்கிறது என மஸ்க் குற்றம்சாட்டி, இந்திய சட்டங்களை மதிக்கும் போது அனுமதி ஏன் கிடைக்கவில்லை என சமூக வலைதளத்தில் கேள்வி எழுப்பினார். இதையடுத்து ஆதரவும் எதிர்ப்பும் கலந்த விவாதங்கள் எழுந்தன. காங்கிரஸ் தலைவர் ராகுல் காந்தியும் கருத்து தெரிவித்ததைத் தொடர்ந்து, செயற்கைக்கோள் தகவல் தொடர்பு சேவை தேசிய பாதுகாப்புடன் நேரடியாக தொடர்புடையது என்பதால் மிகுந்த கவனம் தேவை என விமர்சனங்கள் முன்வைக்கப்பட்டன.
இந்த விவாதத்தில் மேற்கோளாகக் கூறப்பட்ட ராணுவ பெண் அதிகாரி, உக்ரைன் மீது ரஷ்யா தாக்குதல் நடந்தபோது இணைய சேவை பாதிக்கப்பட்ட நிலையில் ஸ்டார்லிங்க் உதவ முன்வந்ததாகவும், ஆனால் கிரீமியா பகுதியில் சேவை வழங்க மறுத்ததாகவும் குறிப்பிட்டார். போர் அல்லது தேசிய அவசர நிலை நேரங்களில் தொலைத்தொடர்பு தொடர்பான முக்கிய முடிவுகளுக்கு வெளிநாட்டில் இருக்கும் ஒருவரின் முடிவுகளை சார்ந்திருக்க வேண்டுமா என்ற கேள்வியையும் அவர் எழுப்பினார்.
டில்லியில் நடைபெற்ற ‘மொபைல் காங்கிரஸ் 2026’ மாநாட்டில் பேசிய சிந்தியா, இந்தியாவில் செயற்கைக்கோள் தகவல் தொடர்பு சேவைக்காக மூன்று நிறுவனங்களுக்கு உரிமங்கள் வழங்கப்பட்டுள்ளதாக கூறினார். ஒவ்வொரு நிறுவனமும் பாதுகாப்புத் தேவைகள் மற்றும் தகுதி நிபந்தனைகளை தனித்தனியாக பூர்த்தி செய்த பிறகே சேவையை தொடங்க முடியும் என்றார். மேலும், இந்தியாவில் 110 கோடி பிராட்பேண்ட் இணைப்புகள் உள்ளதாகவும், 99.98% மாவட்டங்களில் 5ஜி சேவை கொண்டு சேர்க்கப்பட்டுள்ளதாகவும் தெரிவித்தார்.
காங்கிரஸின் நிலைப்பாடு குழப்பமாக இருப்பதாக விமர்சித்த அவர், உரிமம் ஒரு நிறுவனத்திற்கே வழங்கப்பட்டதாக இல்லை; ஸ்டார்லிங்க் உட்பட மூன்று நிறுவனங்களுக்கே வழங்கப்பட்டுள்ளதாக கூறினார். பாதுகாப்பு நடவடிக்கைகள் நிறைவேற்றப்பட்ட பிறகே சேவை தொடங்க அனுமதி வழங்கப்படும்; இது உரிமம் பெற்ற அனைத்து நிறுவனங்களுக்கும் பொருந்தும் என்றும், எந்த வகையிலும் நாட்டின் பாதுகாப்பில் சமரசம் இல்லை என்றும் அவர் வலியுறுத்தினார்.
