புதுடில்லியில் தேர்தல் ஆணையருக்கு எதிராக ஒரு அமைப்பு போராட்டத்திற்கு அழைப்பு விடுத்த நிலையில், அதைத் தடுக்க டில்லி அரசு பல்வேறு கட்டுப்பாடுகளை விதித்தது.
அதன் ஒரு பகுதியாக சில மெட்ரோ நிலையங்கள் மூடப்பட்டன; முக்கிய சாலைகளில் பொதுமக்கள் செல்ல அனுமதி மறுக்கப்பட்டது; இணைய சேவையும் முடக்கப்பட்டது. இதை கவனத்தில் எடுத்த உச்சநீதிமன்றம், பொதுமக்களுக்கு பாதிப்பு ஏற்படாத வகையில் மெட்ரோ நிலையங்களை திறக்க அறிவுறுத்தியிருந்தது.
ஆனால் போராட்டக்காரர்கள் தடையை மீறி வர முயன்றதாக கூறி, அந்த உத்தரவை டில்லி அரசு நடைமுறைப்படுத்தவில்லை. இதையடுத்து, விதிக்கப்பட்ட தடைகளை எதிர்த்து வழக்கறிஞர் சைலேந்திர மணி திரிபாதி உச்சநீதிமன்றத்தில் அவமதிப்பு வழக்கு தொடர்ந்தார்.
மேலும் அரசியல் தலைவர்கள் கைது செய்யப்பட்டதை எதிர்த்து திரிணமுல் காங்கிரஸ் எம்பியும் மூத்த வழக்கறிஞருமான மேனகா குருசுவாமி மனு தாக்கல் செய்தார். இந்த அவமதிப்பு வழக்கும், கைதுக்கு எதிரான மனுவும் இன்று (அக். 11) ஞாயிற்றுக்கிழமை சிறப்பு அமர்வில் விசாரிக்கப்படுகின்றன; நீதிபதிகள் ஜாய்மால்யா பக்சி மற்றும் வி. மோகனா அடங்கிய அமர்வு விசாரணை நடத்துகிறது. பொதுவாக ஞாயிற்றுக்கிழமை உச்சநீதிமன்றத்தில் விடுமுறை நாளாகும்.
