டில்லியிலிருந்து சென்னையை நோக்கி புறப்பட்ட இண்டிகோ விமானம், நடுவானில் தீ ஏற்பட்டதாக தகவல் வெளியானதைத் தொடர்ந்து சனிக்கிழமை ஹைதராபாத்தில் அவசரமாக தரையிறக்கப்பட்டது.
கிடைத்த தகவலின்படி, விமானம் மதியம் சுமார் 1.30 மணிக்கு டில்லியில் இருந்து புறப்பட்டு மாலை 4 மணியளவில் சென்னை விமான நிலையத்தை அடைய திட்டமிடப்பட்டிருந்தது. ஆனால் பாதுகாப்பு முன்னெச்சரிக்கையாக ஹைதராபாத்துக்கு திசைமாற்றி தரையிறக்கப்பட்டது.
பயணிகளின் உடமைகள் வைக்கும் பகுதியில் தீ ஏற்பட்டதாக கூறப்படுகிறது. விமான ஊழியர்கள் விமானத்தில் உள்ள தீயணைப்பு கருவியை பயன்படுத்தி உடனடியாக தீயை அணைத்தனர்.
இந்த சம்பவத்தின் துல்லிய காரணம் அல்லது யாருக்கேனும் பாதிப்பு ஏற்பட்டதா என்பது குறித்து தற்போது அதிகாரப்பூர்வ தகவல் வெளியாகவில்லை. பயணியின் பையில் இருந்த பவர் பேங்க் காரணமாக தீ ஏற்பட்டிருக்கலாம் என்ற சந்தேகத்தின் அடிப்படையில் விசாரணை நடைபெற்று வருகிறது.
