சென்னையில் ஜெய்கோபால் கரோடியா பள்ளியின் 50வது ஆண்டு விழாவில் பேசிய பிரதமர் நரேந்திர மோடி, தமிழ் மொழி மற்றும் கலாசாரத்தை உலகளவில் பரப்ப வேண்டும் என்று கேட்டுக்கொண்டார். நவராத்திரி தொடக்கத்தில் தமிழக மண்ணில் கால்பதித்ததாகவும், தமிழகத்தை “சிவசக்தி” ரூபமாகவும் அவர் குறிப்பிட்டார்.
சென்னையில் நடந்த நிகழ்ச்சிகள் காரணமாக தாமதமாக வந்ததாக கூறிய அவர், இதற்காக மன்னிப்பும் கேட்டார். மாணவர்களின் உற்சாகம் நாட்டின் எதிர்காலத்தை காட்டுகிறது என்றும், இந்தியாவுக்கு தற்போது பல வாய்ப்புகள் உள்ளதால் இளைஞர்கள் தங்கள் எதிர்காலத்தை அந்தப் பின்னணியில் காண வேண்டும் என்றும் தெரிவித்தார்.
தமிழ் ஆளுமைகளை நினைவுகூர்ந்த பிரதமர், திருவள்ளுவரின் கருத்துகள் மாணவர்களுக்கு பொருத்தமானவை என்றும், வாழ்நாள் முழுவதும் புதிதாக கற்க விரும்புபவர்களுக்கு திருக்குறள் வழிகாட்டி என்றும் கூறினார். மேலும், ரஷ்ய அதிபர் புடினுக்கு திருக்குறளின் ரஷ்ய மொழிபெயர்ப்பை வழங்கியதாகவும் தெரிவித்தார்.
பாரதியார் குறித்து பேசிய அவர், இளம் வயதில் காசியில் படித்ததால் அந்த நகரத்தின் ஆன்மிக-தேசிய சூழல் பாரதியாரின் மனதில் ஆழ்ந்த தாக்கம் ஏற்படுத்தியதாக கூறினார். “அச்சமில்லை” பாடலை மேற்கோள் காட்டி, பெரிய கனவுகள் காணவும், வித்தியாசமாக சிந்திக்கவும், அச்சமின்றி வாழவும் மாணவர்களை ஊக்குவித்தார்.
கல்வி மற்றும் விளையாட்டு குறித்து, 2014ல் சுமார் 750 இருந்த பல்கலைக்கழகங்கள் இன்று 1,300ஐ தாண்டியுள்ளதாகவும், கல்லூரிகள் 38 ஆயிரத்திலிருந்து 52 ஆயிரத்தை கடந்துள்ளதாகவும் அவர் கூறினார். 2030 காமன்வெல்த் போட்டிகளை நடத்த இந்தியா தயாராகி வருவதாகவும், 2036 ஒலிம்பிக் போட்டிகளை நடத்தும் இலக்குடன் முன்னேறுவதாகவும் தெரிவித்தார்.
