சென்னையில், ஏற்கனவே கைது செய்யப்பட்டு புழல் சிறையில் அடைக்கப்பட்டுள்ள ‘கிரானைட்’ வீரமணி மீது, குழந்தைகள் பாலியல் குற்றங்கள் தடுப்பு சட்டம் (போக்சோ) கீழ் ஆறாவது வழக்கு பதிவு செய்யப்பட்டுள்ளதாக போலீசார் தெரிவித்தனர்.
சிறுமிகளுக்கு கல்வி உதவி செய்வது, தீபாவளி பரிசுப் பொருட்கள் வழங்குவது போன்ற காரணங்களை முன்வைத்து பாலியல் வன்முறை செய்ததாக குற்றச்சாட்டு உள்ளது. இந்த வழக்கில் வீரமணி (85) முன்னதாகவே கைது செய்யப்பட்டுள்ளார்.
குற்றத்திற்கு உடந்தையாக இருந்ததாக கூறப்படும் வீரமணியின் தோழி சாந்தி (60), அவரது கணவர் மகேந்திர சிம்ஹன் (63) உள்ளிட்ட ஆறு பேர் இதுவரை கைது செய்யப்பட்டுள்ளதாக போலீசார் கூறினர்.
வீரமணி மீது ஏற்கனவே ஐந்து போக்சோ வழக்குகள் பதிவு செய்யப்பட்ட நிலையில், தற்போது மேலும் ஒரு புகாரின் அடிப்படையில் ஆறாவது வழக்கு சேர்க்கப்பட்டுள்ளது. இதுவரை இரண்டு வழக்குகளில் மட்டும் அவரை கைது செய்துள்ள நிலையில், மீதமுள்ள வழக்குகளிலும் அடுத்தடுத்து கைது நடவடிக்கை மேற்கொள்ளப்படும் என போலீசார் தெரிவித்தனர்.
இதற்கிடையில், ராயப்பேட்டை லாயிட்ஸ் சாலையில் உள்ள வீரமணியின் சொகுசு பங்களாவில், மதுரை மாவட்ட போலீசாருடன் இணைந்து மத்திய குற்றப்பிரிவு போலீசார் நேற்று மீண்டும் சோதனை நடத்தினர். முன்னதாக நடந்த சோதனைகளில் வழக்குடன் தொடர்புடைய ஆவணங்கள் பறிமுதல் செய்யப்பட்டதாகவும் போலீசார் கூறினர்.
