சென்னை: ‘கிரானைட்’ வீரமணி வழக்கில், போக்சோ வழக்கு விசாரணை எவ்வாறு கையாளப்பட்டது என்பதைக் குறித்து, முன்னாள் சென்னை காவல் ஆணையராக இருந்த கூடுதல் டிஜிபி அருணிடம் விசாரணை நடத்தி வாக்குமூலம் பதிவு செய்யப்பட்டுள்ளதாக காவல் துறை வட்டாரங்கள் தெரிவித்தன.
சிறுமியர்களுக்கு எதிரான பாலியல் வன்முறை குற்றச்சாட்டைத் தொடர்ந்து ‘கிரானைட்’ வீரமணி (85) மீது போக்சோ வழக்கு பதிவு செய்யப்பட்டிருந்தது. அப்போது சென்னை காவல்துறையின் விபசார தடுப்பு பிரிவில் உதவி ஆணையராக இருந்த யாஸ்மின் விசாரணை அதிகாரியாக பணியாற்றினார்.
அந்த விசாரணையில், பிப். 19 அன்று குற்றம் நடந்ததாக கூறப்படும் வீட்டில் ஆதாரம் கிடைக்கவில்லை என்றும், வீடியோவில் உள்ள நபர் வீரமணி என்பதைக் உறுதி செய்ய முடியவில்லை என்றும் உள்ளிட்ட காரணங்களை முன்வைத்து வழக்கு விசாரணை முடிக்கப்பட்டதாக தெரிவிக்கப்பட்டுள்ளது.
பின்னர் ஆட்சி மாற்றத்துக்குப் பிறகு, குற்றச்சாட்டுகள் தீவிரமாக விசாரிக்கப்படுகின்றன. எஸ்.ஐ.டி. (சிறப்பு புலனாய்வு குழு) விசாரணையில் வீரமணி உட்பட ஏழு பேர் கைது செய்யப்பட்டு சிறையில் அடைக்கப்பட்டுள்ளனர்.
இதற்கிடையில், வழக்கை மூடிமறைக்க பல கோடி ரூபாய் கைமாறியதாக குற்றச்சாட்டு எழுந்துள்ளது. அந்த அம்சத்தையும் விசாரித்து வருவதாக எஸ்.ஐ.டி. அதிகாரிகள் போக்சோ நீதிமன்றத்தில் தெரிவித்திருந்தனர்; மேலும், சட்டவிரோத பண பரிமாற்றம் தொடர்பாக மற்றொரு குழு போலீசாரும் விசாரித்து வருகின்றனர். இந்நிலையில் அருணுக்கு சம்மன் அனுப்பி விசாரணை நடத்தப்பட்டு, சுமார் 80 கேள்விகள் கேட்டு வாக்குமூலம் பெறப்பட்டதாக கூறப்படுகிறது. தற்போது அவர் எந்தப் பணியிடமும் வழங்கப்படாமல் காத்திருப்போர் பட்டியலில் உள்ளார்.
