சிறுமியரை பாலியல் வன்முறை செய்ததாக கூறப்படும் போக்சோ வழக்குகளில் கைது செய்யப்பட்ட ‘கிரானைட்’ வீரமணி (85) வீட்டில் இருந்து 55 முக்கிய ஆவணங்களை போலீசார் கைப்பற்றியுள்ளதாக தெரிவித்தனர்.
வீரமணி தற்போது சென்னை புழல் மத்திய சிறையில் அடைக்கப்பட்டுள்ளார். குற்றத்திற்கு உடந்தையாக இருந்ததாக கூறி, அவரது தோழி சாந்தி (61), அவரது கணவர் மகேந்திர சிம்ஹன் (63) உள்ளிட்ட ஆறு பேர் கைது செய்யப்பட்டுள்ளதாக போலீசார் கூறினர்.
வீரமணி மீது ஆறு வழக்குகள் பதிவு செய்யப்பட்டுள்ள நிலையில், சென்னை லாயிட்ஸ் சாலையில் உள்ள அவரது வீட்டில் மதுரை மாவட்ட போலீசாருடன் இணைந்து சிறப்பு புலனாய்வு குழு (எஸ்.ஐ.டி.) போலீசார் நேற்று முன்தினம் சோதனை நடத்தினர்.
விசாரணையின் ஒரு பகுதியாக ஏற்கனவே சில ஆதாரங்கள் கைப்பற்றப்பட்டிருந்ததாகவும், சில தினங்களுக்கு முன் வீரமணியின் கார் ஓட்டுநர்கள் மூவர் கைது செய்யப்பட்ட நிலையில் அவர்கள் அளித்த தகவலின் அடிப்படையில் மீண்டும் சோதனை நடத்தப்பட்டதாகவும் போலீசார் தெரிவித்தனர். இந்த சோதனையில் 55 ஆவணங்கள் கைப்பற்றப்பட்டன என கூறப்பட்டது.
