தூத்துக்குடி அருகே அரசு உதவி பெறும் மேல்நிலைப் பள்ளி தலைமையாசிரியர் மீது, தசரா விரதம் கடைப்பிடித்த மாணவர்களின் மத நம்பிக்கைகளை அவமதித்ததாக போலீசார் வழக்கு பதிவு செய்து விசாரணை நடத்தி வருகின்றனர்.
குலசேகரன்பட்டினம் முத்தாரம்மன் கோவில் தசரா விழாவை முன்னிட்டு பலர் மாலை அணிந்து, கையில் காப்பு கட்டி விரதம் இருப்பது வழக்கம். இதன் ஒரு பகுதியாக ஆத்தூரில் செயல்படும் சண்முகசுந்தரம் நாடார் மேல்நிலைப் பள்ளியில் படிக்கும் 30க்கும் மேற்பட்ட மாணவ–மாணவியர் மாலை மற்றும் காப்பு அணிந்து வந்ததாக கூறப்படுகிறது.
புகாரின்படி, பள்ளிக்கு வந்த மாணவர்களிடம் மாலை மற்றும் காப்புகளை அகற்றுமாறு தலைமையாசிரியர் ரஞ்சித் சிங் (58) கூறியுள்ளார். மாணவர்கள் மறுத்த நிலையில், ஒரு மாணவரின் மாலையை அவர் தானே கழற்றியதுடன், அந்த மாணவரை தாக்கியதாகவும் தெரிவிக்கப்பட்டுள்ளது.
இந்த விவகாரம் பெற்றோருக்கு தெரிய வந்ததைத் தொடர்ந்து, 100க்கும் மேற்பட்ட பெற்றோர் மற்றும் ஹிந்து முன்னணி அமைப்பினர் பள்ளி முன் திரண்டு தரையில் அமர்ந்து போராட்டத்தில் ஈடுபட்டனர். பின்னர் அவர்கள் தூத்துக்குடி–திருச்செந்தூர் சாலையில் மறியலில் ஈடுபட்டதால் போக்குவரத்து பாதிக்கப்பட்டது.
போலீசார் பேச்சுவார்த்தை நடத்திய நிலையில், போராட்டக்காரர்கள் முன்னிலையில் தலைமையாசிரியர் மன்னிப்பு கேட்டதாக கூறப்படுகிறது. இருப்பினும் பெற்றோர் புகார் அளித்ததன் அடிப்படையில், மத நம்பிக்கைகளை வேண்டுமென்றே அவமதித்ததாக தலைமையாசிரியர் மீது வழக்கு பதிவு செய்யப்பட்டது. மேலும் அனுமதியின்றி மறியலில் ஈடுபட்டதாக 90 பேர் மீதும் போலீசார் வழக்கு பதிவு செய்தனர்.
