திருவாரூர் மாவட்டம் மன்னார்குடி அருகேயுள்ள சோழபாண்டியில் நடைபெற்ற நிகழ்ச்சியில், ‘வீ த லீடர்ஸ்’ அமைப்பின் தலைவர் அண்ணாமலை, வரும் உள்ளாட்சி தேர்தலில் அந்த அமைப்பு போட்டியிடும் என்று அறிவித்தார்.
அரசியல் என்பது ஒருவரை ஒருவர் குற்றம்சாட்டும் நிலைக்கு மாறிவிட்டதாக அவர் கூறினார். சட்டசபை தேர்தல் காலத்தில் தாராபுரத்தில் வீதி வீதியாக பிரசாரம் செய்த அனுபவத்தை நினைவுபடுத்திய அவர், வெற்றி பெற்ற பிரதிநிதிகள் பின்னர் கட்சியில் இருந்து விலகும் போக்கு போன்றவற்றை சுட்டிக்காட்டி, இது அரசியலின் தவறான போக்கு என விமர்சித்தார்.
இந்த போக்கை உடைப்பதற்காகவே ‘வீ த லீடர்ஸ்’ களம் இறங்கியுள்ளதாகவும், உள்ளாட்சி தேர்தலில் நேரடியாக போட்டியிட உள்ளதாகவும் அவர் தெரிவித்தார். எதிர்காலத்தில் அமைப்பு அரசியல் கட்சியாக மாறும் போது, இதுபோன்ற மாற்று அரசியல் தேவை என்று பலரும் கூறுவார்கள் என்றும் அவர் குறிப்பிட்டார்.
சினிமாவிலிருந்து அரசியலுக்கு வருவதில் தவறில்லை; மக்களுக்கு பிடித்தால் அவர்கள் வாக்களிக்கிறார்கள் என்றும் அண்ணாமலை கூறினார். ஆனால், எதற்காக வாக்களிக்கிறோம் என்பதை புரிந்து கொண்டு மக்கள் வாக்களிக்க வேண்டும் என்று அவர் வலியுறுத்தினார்.
இதற்கிடையில், ‘வீ த லீடர்ஸ்’ அமைப்பின் பொதுச்செயலர் அஸ்பயர் சுவாமிநாதன் வெளியிட்ட அறிக்கையில், குழந்தைகள் தினத்திற்காக பள்ளி மாணவர்கள் 61.84 லட்சம் பேருக்கு ரூ.9.27 கோடி மதிப்பில் கேக் வழங்க அரசு திட்டமிட்டுள்ளதாக கூறி, அதில் பாதுகாப்பு அம்சங்கள் குறித்து கேள்வி எழுப்பினார். இந்திய உணவு பாதுகாப்பு மற்றும் தர நிர்ணய ஆணையத்தின் சான்றிதழ் உள்ளிட்ட நிபந்தனைகள் அவசியம் என்றும், ஏதேனும் அசம்பாவிதம் நடந்த பின் விசாரணை நடத்துவதற்குப் பதிலாக முன்கூட்டியே தடுப்பதே நல்ல நிர்வாகம் என்றும் கூறி, திட்டத்தை மறுபரிசீலனை செய்ய வேண்டும் என வலியுறுத்தினார்.
