கோவை: தமிழகத்தில் அதிக அளவில் காற்றாலை மின் உற்பத்தி இருந்தும், பீக் ஹவரில் ரூ.35 போன்ற உயர்ந்த விலையில் மின்சாரம் வாங்க வேண்டிய நிலை ஏன் என்ற கேள்வியை “வீ த லீடர்ஸ்” அமைப்பின் அண்ணாமலை எழுப்பினார்.
நிருபர்களிடம் பேசிய அவர், புதுப்பிக்கத்தக்க எரிசக்தி குறித்து பேசினாலும் அதை சேமித்து வைக்கும் பேட்டரி வசதி மற்றும் அதற்கான கட்டமைப்பு தமிழகத்தில் போதுமானதாக இல்லை என்றார். ராஜஸ்தான், மத்திய பிரதேசம் போன்ற மாநிலங்களில் பேட்டரி சேமிப்பு திறன் இருப்பதாகவும், தமிழகத்தில் அதற்கான முதலீடு செய்யப்படவில்லை என்றும் குறிப்பிட்டார்.
தமிழக மின்சார வாரியம் பல ஆண்டுகளாக பீக் ஹவரில் ஏற்படும் மின்பற்றாக்குறையை சமாளிக்க ரூ.35, ரூ.30, ரூ.28 போன்ற விலைகளில் மின்சாரம் வாங்கி வருவதாக அவர் கூறினார். இதனால் மின்கட்டணம் உயர்வதோடு தொழில்துறைக்கும் பாதிப்பு ஏற்படுகிறது என்றார்.
அரசு பொறுப்பான பதில் கூறுவதோடு மட்டும் அல்லாமல், குறைந்தது ஓராண்டுக்கான தெளிவான கொள்கை திட்டத்தை வெளியிட வேண்டும் என்றும், அடுத்த ஆண்டுக்குள் எவ்வாறு இந்த நிலையை சரி செய்யப் போகிறார்கள் என்பதையும் தெரிவிக்க வேண்டும் என்றும் அவர் வலியுறுத்தினார்.
மேலும், சினிமாவிலிருந்து அரசியலுக்கு வருபவர்களை வரவேற்க வேண்டும் என்றும், தமிழகத்தில் நடந்த ஒரு இடைத்தேர்தலில் எந்தக் கட்சியும் பணம் வழங்காததை தான் பார்த்ததாகவும் கூறினார். ஈரோடு இடைத்தேர்தல் போன்றவற்றில் பரிசுப் பொருட்கள் வழங்கப்பட்டதாகவும், அதை படம் பிடித்த பத்திரிகையாளர்கள் தாக்கப்பட்ட சம்பவங்களும் இருந்ததாகவும் அவர் குற்றம்சாட்டினார். தற்போதைய இடைத்தேர்தலில் மாற்றம் ஏற்பட்டுள்ளதாக கூறி, பணம் வழங்காமல் தேர்தலை சந்தித்ததாக “தவெகா”வை பாராட்டினார். ரஜினிகாந்துக்கு ஏற்கனவே வாழ்த்து தெரிவித்ததாகவும், நேரம் கிடைத்ததும் “ஜெயிலர் 2” பார்க்க திட்டமிட்டுள்ளதாகவும் அவர் தெரிவித்தார்.
