கோவை காந்திபுரத்தில் தமிழக பொதுப்பணித்துறை சார்பில் ரூ.300 கோடி செலவில் உருவாக்கப்பட்ட ‘பெரியார் அறிவுலகம்’ (நூலகம் மற்றும் அறிவியல் மையம்) இன்று (அக்.16) காலை 11 மணிக்கு திறக்கப்படுகிறது. முதல்வர் விஜய் திறந்து வைத்து வளாகத்தை பார்வையிட உள்ளார்.
முதல்வர் சென்னையிலிருந்து விமானத்தில் கோவை வந்து, அவிநாசி சாலை–எல்.ஐ.சி.–பார்க் கேட் வழியாக நஞ்சப்பா சாலை திருப்பத்தில் வலப்புறம் திரும்பி நூலகத்தை அடைவார் என தெரிவிக்கப்பட்டுள்ளது. சுமார் 10 கி.மீ. தூரம் நடைபெறும் ரோடு ஷோவுக்காக சாலையின் இருபுறமும் பொதுமக்கள் நின்று பார்வையிடும் வகையில் ஏற்பாடுகள் செய்யப்பட்டுள்ளன; பேரிகார்டுகளும் அமைக்கப்பட்டுள்ளன.
அறிவியல் மையத்தில் உள்ள பல்வேறு படைப்புகள் மற்றும் செயல்பாடுகளை அரசு மற்றும் மாநகராட்சி பள்ளி மாணவ, மாணவியர் விளக்க உள்ளனர். மேலும் முடிவுற்ற திட்டங்களை தொடங்கி வைப்பதுடன், புதிய திட்டங்களுக்கு அடிக்கல் நாட்டி, பயனாளிகளுக்கு நலத்திட்ட உதவிகளும் வழங்கப்பட உள்ளன.
இந்த திட்டம் தமிழக அரசின் 2024–25 பட்ஜெட்டில் அறிவிக்கப்பட்டது. சிறைத்துறைக்கு சொந்தமான 6.98 ஏக்கர் நிலத்தில், சுமார் 1.98 லட்சம் சதுரஅடி பரப்பளவில் தரைத்தளம் மற்றும் ஏழு தளங்களுடன் கட்டப்பட்டுள்ளது. புத்தகங்களை அடுக்கி வைத்திருப்பதைப் போல வடிவமைக்கப்பட்டிருப்பது இதன் சிறப்பம்சமாக கூறப்படுகிறது.
வளாகத்தில் மாற்றுத்திறனாளிகள் பிரிவு, ஆடிட்டோரியம், கோளரங்கம், அறிவியல் கண்காட்சி அறை, குழந்தைகள் நூலகம், போட்டித் தேர்வு நூலகம், தமிழ் மற்றும் ஆங்கில நூல்கள் பிரிவுகள், இன்குபேஷன் சென்டர்கள், டிஜிட்டல் நூலகம் மற்றும் அறிவியல் மையம் உள்ளிட்ட வசதிகள் உள்ளன. ரோபோவிடம் கேள்வி கேட்கும் அமைப்பு, கலாம் தொடர்பான ஏ.ஆர். அனுபவம், சூரிய குடும்பக் காட்சிகள், தலைகீழ் படிப்பகம், இயந்திர டி-ரெக்ஸ் உள்ளிட்ட பல அறிவியல் அனுபவங்களும் இடம் பெற்றுள்ளன; ஒவ்வொரு இடத்திலும் தமிழ் மற்றும் ஆங்கிலத்தில் விளக்கங்கள் வழங்கப்பட்டுள்ளன.
