வாகனங்களில் தேசிய மற்றும் அரசு சின்னங்களை தவறாகப் பயன்படுத்துவது, மேலும் அங்கீகரிக்கப்படாத ஸ்டிக்கர்கள் ஒட்டப்படுவது தொடர்பாக எடுக்கப்பட்ட நடவடிக்கைகள் குறித்து போக்குவரத்து துறை கமிஷனர் அறிக்கை தாக்கல் செய்ய வேண்டும் என்று சென்னை உயர் நீதிமன்றம் உத்தரவிட்டுள்ளது.
பஸ் சேவை தொடர்பான வழக்கு நீதிபதி என்.செந்தில்குமார் முன் விசாரணைக்கு வந்தபோது இந்த உத்தரவு பிறப்பிக்கப்பட்டது. மேலும், இந்த வழக்கில் போக்குவரத்து துறை கமிஷனரை எதிர்மனுதாரராக இணைக்கவும் நீதிமன்றம் உத்தரவிட்டது.
கடந்த ஆறு மாதங்களில் அரசு மற்றும் தனியார் வாகனங்களில் “பத்திரிகையாளர்”, “மருத்துவர்”, “வழக்கறிஞர்”, “காவல் துறை” போன்ற அங்கீகாரம் இல்லாத ஸ்டிக்கர்கள்/வாசகங்கள் இடம்பெறும் நடைமுறைக்கு எதிராக என்ன நடவடிக்கை எடுக்கப்பட்டது என்பதையும் அறிக்கையில் தெரிவிக்க வேண்டும் என கூறப்பட்டுள்ளது.
முன்னாள் எம்.பி., எம்.எல்.ஏ.,க்கள், ஓய்வுபெற்ற அதிகாரிகள் உள்ளிட்டோர் தங்களது வாகனங்கள், கடிதத் தாள்கள் அல்லது கட்டடங்களில் அரசு சின்னங்களை பயன்படுத்துவது அங்கீகரிக்கப்படவில்லை என்றும், இருந்தும் பலர் அவற்றை தவறாகப் பயன்படுத்தி வாகனங்களில் ஒட்டி வருவதாகவும் நீதிமன்றம் குறிப்பிட்டது. மேலும், தவறாகப் பயன்படுத்தப்படும் தேசிய சின்னங்களை ஒரு மாதத்திற்குள் அகற்றவும், விதிமீறலில் ஈடுபட்டவர்கள்மீது வழக்குப் பதிவு செய்யவும் டி.ஜி.பி.க்கு முன்பே வழங்கப்பட்ட உத்தரவு அமல்படுத்தப்பட்டதா என்பதையும் அறிக்கையாக தாக்கல் செய்ய வேண்டும் என தெரிவித்துள்ளது.
