புதுடில்லி: தேர்தல் ஆணையத்திற்கு எதிராக போராட்டம் நடத்தி வரும் காங்கிரஸ் தலைவர் ராகுல் காந்தியை, பாஜ பொதுச்செயலாளரும் முன்னாள் மத்திய அமைச்சருமான ஸ்மிருதி இரானி கடுமையாக விமர்சித்தார்.
“தேர்தலில் வெற்றி பெற முடியாத இளவரசர், ஒருநாள் பேரரசராக வேண்டும் என்ற ஆசையில் அரசியல் நாடகம் ஆடுகிறார்” என அவர் கிண்டலிட்டார்.
ராகுல் காந்தி முன்வைக்கும் வாக்குத் திருட்டு குற்றச்சாட்டுகளுக்கு ஆதாரம் இல்லை என்றும், ஊடக கவனத்தை ஈர்ப்பதற்காகவே இவ்விவகாரத்தை அவர் எழுப்புவதாகவும் இரானி குற்றம்சாட்டினார்.
ஜனநாயக நாட்டில் ஆட்சியை மாற்றுவது தேர்தல் வழியாக மட்டுமே சாத்தியம் என்றும், போராட்டங்கள் மூலம் ஆட்சியைக் கவிழ்க்க முயற்சிப்பது சரியல்ல என்றும் அவர் தெரிவித்தார்.
தேர்தல் ஆணையத்திற்கு ஆதரவாக பேசிய அவர், நாட்டின் 90 கோடி வாக்காளர்களில் சுமார் 90 சதவீதம் பேர் சரிபார்க்கப்பட்டுள்ளதாகவும், வாக்காளர் பட்டியல் சரிபார்ப்பில் சுமார் 20 லட்சம் வாக்குச்சாவடி முகவர்கள் பங்கேற்றுள்ளதாகவும் கூறினார். வாக்காளர் பட்டியலில் தவறுகள் இருந்தால் அவற்றைச் சரிசெய்வது அவசியம்; முறைகேடு குற்றச்சாட்டுகளை முன்வைப்பவர்கள் ஆதாரங்களை வழங்க வேண்டும் என்றும் அவர் வலியுறுத்தினார்.
