அ.தி.மு.க. மூத்த தலைவர் சைதை சா. துரைசாமி, தமிழக அரசியல் வரலாற்றில் அக்டோபர் 17-ஆம் தேதியை ‘மக்கள் ஜனநாயகப் புரட்சி நாள்’ என நினைவுகூர வேண்டும் என்று கூறியுள்ளார். லஞ்சம், ஊழல், குடும்ப வாரிசு அரசியலை எதிர்த்து பொதுமக்கள், தொண்டர்கள், ரசிகர்கள் முன்வந்து உருவாக்கிய இயக்கம் அ.தி.மு.க. என்பதே இன்றைய தலைமுறை அறிய வேண்டிய உண்மை என்றும் அவர் தெரிவித்தார்.

1971-க்கு பிந்தைய காலத்தில் கருணாநிதி தலைமையிலான தி.மு.க. ஆட்சியை பெருந்தலைவர் காமராஜர் கடுமையாக விமர்சித்ததாக அவர் குறிப்பிட்டார். அப்போது கட்சிக்குள் எம்.ஜி.ஆர். ஓரங்கட்டப்பட்டதாகவும், எம்.ஜி.ஆர். மன்றங்கள் ‘மு.க. முத்து மன்றங்கள்’ என மாற்றப்பட்டதாகவும் அவர் குற்றம்சாட்டினார்.

இதன் பின்னணியில் 1972 அக்டோபர் 10-ஆம் தேதி எம்.ஜி.ஆர். தி.மு.க.-விலிருந்து நீக்கப்பட்ட செய்தி காட்டுத்தீ போல பரவியதும், தமிழகம் முழுவதும் கடையடைப்பு, உண்ணாவிரதம், ஊர்வலம், ஆர்ப்பாட்டம் போன்ற போராட்டங்கள் வெடித்ததாக அவர் கூறினார். அதிர்ச்சியை தாங்க முடியாமல் சிலர் தற்கொலை செய்துகொண்டதாகவும் அவர் தெரிவித்தார். போராட்டங்களை முறைப்படுத்த அனகாப்புத்தூர் ராமலிங்கம் தலைமையில் அமைதிக்குழு அமைக்கப்பட்டாலும், எம்.ஜி.ஆர். புதிய கட்சி தொடங்க வேண்டும் என்பதே ஒரே கோரிக்கையாக இருந்ததாக அவர் சொன்னார்.

மக்கள் உயிர் தியாக நடவடிக்கைகளில் ஈடுபட வேண்டாம் என்று எம்.ஜி.ஆர். உருக்கமாக வேண்டுகோள் விடுத்ததாகவும், தற்கொலை முயற்சிகள் கோழைத்தனம் என்று அவர் கூறியதாகவும் துரைசாமி நினைவுகூர்ந்தார். மக்களின் வேண்டுகோளுக்கிணங்க அனகாப்புத்தூர் ராமலிங்கம் பதிவு செய்த ‘அண்ணா திராவிட முன்னேற்ற கழகம்’ அக்டோபர் 17-ஆம் தேதி எம்.ஜி.ஆரின் கட்சியாக அறிவிக்கப்பட்டதாகவும், முதல் வாரத்திலேயே 11 லட்சம் பேர் உறுப்பினர்களானதாகவும் அவர் கூறினார்.

மேலும், எம்.ஜி.ஆர். காலத்தில் அ.தி.மு.க.-வில் தொண்டர்களுக்கு அதிக அதிகாரம் வழங்கப்பட்டதாகவும், பொதுச்செயலர் முதல் கிளைச் செயலர் வரை தொண்டர்கள் வாக்கெடுப்பில் தேர்வு செய்யப்பட வேண்டும் என்ற ஜனநாயக விதி அறிமுகப்படுத்தப்பட்டதாகவும் அவர் தெரிவித்தார். 1980-ல் நடந்த உட்கட்சித் தேர்தலில் கடும் போட்டி நிலவியதாகவும், சைதாப்பேட்டை தொகுதி செயலர் தேர்தலில் தான் போட்டியின்றி தேர்ந்தெடுக்கப்பட்டதாகவும், அதற்காக எம்.ஜி.ஆர். நேரில் அழைத்து பாராட்டியதாகவும் அவர் கூறினார்.

இறுதியாக, தி.மு.க.-வை அரசியலில் இருந்து அப்புறப்படுத்த சரியான சூழல் இப்போது அமைந்துள்ளதாக கூறிய துரைசாமி, பிரிந்து நிற்கும் அ.தி.மு.க. அணிகள் ஒன்றிணைந்து சரியான கூட்டணி அமைத்து, தி.மு.க.-வை வேரோடு அழிக்கும் எம்.ஜி.ஆரின் லட்சியத்தை நிறைவேற்ற சபதமேற்க வேண்டும் என்று வலியுறுத்தினார்.