சென்னை: போக்சோ வழக்கில் கைது செய்யப்பட்டுள்ள ‘கிரானைட்’ வீரமணி (85), தோழி சாந்தி (61) அமைத்ததாக கூறப்படும் சதி வலையில் சிக்கியதாகவும், குற்றத்தை மறைக்க முயன்றபோது பல கோடி ரூபாயை இழந்ததாகவும் விசாரணையில் தெரிவித்ததாக போலீஸ் தரப்பில் கூறப்படுகிறது.
சிறுமியரை பாலியல் வன்முறை செய்ததாக உள்ள குற்றச்சாட்டில் வீரமணி, சாந்தி உள்ளிட்ட ஏழு பேர் கைது செய்யப்பட்டு புழல் சிறையில் அடைக்கப்பட்டுள்ளனர். வீரமணி மீது ஏழு வழக்குகள் இருப்பதாகவும், சமீபத்தில் போக்சோ வழக்கில் கைது செய்யப்பட்டதாகவும் போலீசார் தெரிவித்துள்ளனர். சிறப்பு புலனாய்வு குழு (SIT) அவரை இரண்டு நாள் போலீஸ் காவலில் எடுத்து விசாரித்து வருகிறது.
போலீஸ் தரப்பில் கூறப்படுவதன்படி, வீரமணி அளித்ததாக கூறப்படும் வாக்குமூலத்தில், சாந்தி ரகசியமாக வீடியோ எடுத்து மிரட்டி பணம் பறித்ததாகவும், அவரது கணவரும் இதற்கு உடந்தையாக இருந்ததாகவும் கூறியுள்ளார். ஈஞ்சம்பாக்கத்தில் உள்ள பல கோடி மதிப்புள்ள நிலத்தை விற்று பணம் தருமாறு மிரட்டப்பட்டதாகவும், பின்னர் தகவல்கள் கசியத் தொடங்கியதால் குறைந்த விலைக்கு நிலத்தை விற்க நேரிட்டதாகவும் அவர் கூறியதாக தெரிவிக்கப்படுகிறது.
மேலும், பணம் கொடுத்த பின்னும் மிரட்டல் தொடர்ந்ததாகவும், அரசியல்வாதிகள் உள்ளிட்ட பலர் மிரட்டத் தொடங்கியதாகவும், சாந்தி அவர்களிடம் பணம் வாங்கி கொடுத்ததாகவும் அவர் கூறியதாக போலீஸ் தரப்பு தெரிவித்துள்ளது. விவகாரம் போலீஸ் வரை சென்றபோது, மகளிடம் தகவல் தெரிவித்ததாகவும், அவர் ரயில்வே தொழிற்சங்க நிர்வாகி கண்ணையாவின் மகன் பிரகாஷை அறிமுகம் செய்து வைத்ததாகவும், பிரகாஷ் வழியாக விவகாரத்தை மூடி மறைக்க கோடிகளை கொடுத்து இழந்ததாகவும் கூறியதாக தகவல்.
இதற்கிடையில், வீரமணி வீட்டிலிருந்து இடைத்தரர்கள் மூலம் அதிகாரிகளுக்கு 23 கிலோ தங்கம் வழங்கப்பட்டதாகக் கூறும் ஆவணம் கிடைத்துள்ளதாக போலீசார் தெரிவித்தனர். அந்த தங்கம் எந்தெந்த அதிகாரிகளுக்கு சென்றது என்பதைக் கண்டறிய SIT அதிகாரிகள் வீரமணியிடம் விசாரித்து வருகின்றனர்.
