தி.மு.க. எம்.பி.க்கள் கூட்டத்தில், மின்னணு ஓட்டுப்பதிவு இயந்திரம் (ஈவிஎம்) மாற்றாக மீண்டும் ஓட்டுச்சீட்டு முறையை கொண்டு வர வேண்டும் என்ற தீர்மானம் நிறைவேற்றப்பட்டதாக செய்திகள் வெளியாகின. இதை பா.ஜ.க. தன்னார்வ தொண்டு நிறுவன பிரிவு தலைவர் இரா.அர்ஜுனமூர்த்தி விமர்சித்து, இது பின்னோக்கிச் செல்லும் அணுகுமுறை எனக் குறிப்பிட்டார்.
2021 சட்டசபைத் தேர்தலில் தி.மு.க. ஆட்சியை கைப்பற்றியதும், 2024 லோக்சபா தேர்தலில் தி.மு.க. தலைமையிலான கூட்டணி 39 தொகுதிகளிலும் வெற்றி பெற்றதும் ஈவிஎம் முறையிலேயே நடந்ததாக அவர் சுட்டினார். ஆனால் 2026 சட்டசபைத் தேர்தல் முடிவுகளுக்குப் பிறகு, ஈவிஎம் மற்றும் வாக்காளர் பட்டியல் சிறப்பு தீவிர திருத்தம் (எஸ்.ஐ.ஆர்.) தொடர்பான விவாதங்கள் தீவிரமடைந்துள்ளதாக கூறினார்.
ஒரு தேர்தலில் கிடைத்த வெற்றியை மக்கள் தீர்ப்பாக ஏற்றுக்கொண்டு, மற்றொரு தேர்தலில் ஏற்பட்ட பின்னடைவுக்கு தொழில்நுட்பத்தையே காரணமாக்குவது முரண்பாடாகத் தோன்றுகிறது என அவர் தெரிவித்தார். தோல்வி மட்டும் இயந்திர முறைகேடுக்கு சான்றாகாது; குற்றச்சாட்டுகள் முன்வைக்கப்படின் அவை ஆதாரங்களுடன் விசாரிக்கப்பட வேண்டும் என்றும் வலியுறுத்தினார்.
ஈவிஎம் பயன்பாடு 1982-ல் கேரளாவின் பரூர் தொகுதியில் பரிசோதனை முறையில் தொடங்கி, 2004-ல் நாடு முழுவதும் லோக்சபா தேர்தலுக்கு விரிவடைந்ததாக அவர் நினைவூட்டினார். 2019 லோக்சபா தேர்தலில் அனைத்து ஓட்டுச் சாவடிகளிலும் ‘விவிபேட்’ காகித தடம் பயன்படுத்தப்பட்டதாகவும் கூறினார். பல கோடி வாக்குகளை பதிவு செய்து முடிவுகளை அறிவிக்கும் தேர்தல் ஆணையத்தின் பணிக்கு வலுவான தொழில்நுட்பம் தேவை; ஆதாரமற்ற குற்றச்சாட்டுகளின் அடிப்படையில் அதை முழுமையாக நிராகரிப்பது தீர்வல்ல; மேம்படுத்துவதே அவசியம் என்றார்.
வாக்காளர் பட்டியலில் இறந்தவர்களின் பெயர்கள் தொடர்வது, ஒரே நபரின் பல பதிவுகள், இடம்பெயர்ந்தவர்களின் விவரங்கள் புதுப்பிக்கப்படாமை போன்ற சிக்கல்களை சரி செய்ய எஸ்.ஐ.ஆர். போன்ற நடவடிக்கைகள் தேவை என அவர் கூறினார். அதே நேரத்தில் தகுதியுள்ள குடிமகனின் பெயர் தவறுதலாக நீக்கப்படாமல், அறிவிப்பு, ஆட்சேபனை, திருத்தம், மேல்முறையீடு போன்ற வாய்ப்புகள் உறுதி செய்யப்பட வேண்டும் என்றும் வலியுறுத்தினார். குற்றச்சாட்டுகள் இருந்தால் தரவுகளுடன் முன்வைக்க வேண்டும்; தேர்தல் ஆணையமும் நடைமுறைகளை வெளிப்படையாக விளக்க வேண்டும் என அவர் தெரிவித்தார்.
