சென்னையில் நவீன வசதிகளுடன் கூடிய சட்டசபை மற்றும் தலைமைச் செயலக வளாகம் அமைக்கப்படும் என முதல்வர் விஜய் அறிவித்துள்ளார். இது சுமார் 20 லட்சம் சதுரடி பரப்பளவில், ரூ.1,200 கோடி மதிப்பீட்டில் உருவாகும் என கூறப்பட்டுள்ளது.
முதலில் பட்டினம்பாக்கத்தில், முதல்வர் இல்லம் அருகிலுள்ள இடத்தில் தலைமைச் செயலகம் கட்ட அரசாணை வெளியானது. ஆனால் அந்த இடத்தில் கட்டுவதற்கு எதிர்ப்பு தெரிவித்து மீனவர்கள் போராட்டத்தில் ஈடுபட்டதால், அரசு தனது முடிவை மறுபரிசீலனை செய்ய முடிவு செய்ததாக தெரிவிக்கப்படுகிறது.
அதிகாரிகள் கூறுகையில், புதிய தலைமைச் செயலகத்திற்கான இடத் தேர்வில் பல்லவன் இல்லமும் இடம்பெற்றுள்ளதாகவும், இறுதி முடிவு இன்னும் எடுக்கப்படவில்லை என்றும் தெரிவித்தனர். ஒரு வாரத்தில் அறிவிப்பு வெளியாகும் என எதிர்பார்ப்பதாகவும், பேருந்து, புறநகர் ரயில் மற்றும் மெட்ரோ வழியாக ஊழியர்கள் எளிதில் வந்து செல்ல முடியும் என்றும் அவர்கள் கூறினர்.
சுமார் 13.22 ஏக்கர் பரப்பளவு கொண்ட பல்லவன் இல்ல வளாகத்தில் தற்போது மெட்ரோபொலிட்டன் போக்குவரத்துக் கழகம் (எம்டிசி) மற்றும் மாநில விரைவுப் போக்குவரத்துக் கழகத்தின் (எஸ்இடிசி) அமைப்புகள் செயல்படுகின்றன. இது அரசுக்குச் சொந்தமான நிலம் என்பதால் கூடுதல் கையகப்படுத்தல் தேவையில்லை; இதனால் பொதுமக்கள் மத்தியில் எதிர்ப்பு குறைய வாய்ப்புள்ளதாகவும் அதிகாரிகள் கருதுகின்றனர்.
அதே நேரத்தில், அங்கு இயங்கும் எம்டிசி அமைப்புகளை வேறு இடத்திற்கு மாற்ற வேண்டியிருக்கும். மாற்று இடமாக சென்னை புறநகர் பேருந்து நிலையம் (சிஎம்பிடி) உள்ளிட்ட இடங்கள் அதிகாரிகளின் பரிசீலனையில் இருப்பதாக தெரிவிக்கப்பட்டுள்ளது.
