ஒருகாலத்தில் குடும்பத்தினருடன் இணைந்து வாழ்ந்த முதியவர்கள், இப்போது காப்பகங்களை நாடும் நிலை அதிகரித்து வருவதாக கோவை மாவட்டத்தில் காணப்படுகிறது. இந்த மாற்றம், முதியோர் பராமரிப்பு தொடர்பான எதிர்கால சவால்கள் குறித்து பல கேள்விகளை எழுப்பியுள்ளது.
அக். மாதம் வரை மாவட்டத்தில் 65 முதியோர் காப்பகங்கள் செயல்பட்டதாக தெரிவிக்கப்பட்டுள்ளது. இதில் மத்திய–மாநில அரசுகளின் ஒருங்கிணைப்பில் இயங்கும் ஒரு காப்பகம், மாநில அரசின் மானியத்துடன் செயல்படும் மூன்று காப்பகங்கள், மேலும் தனியார் காப்பகங்கள் அடங்கும். தற்போது மேலும் ஒரு காப்பகம் பட்டியலில் இணைந்துள்ளதாக அதிகாரிகள் கூறினர்.
புறநகர் பகுதிகளில் புதிதாக காப்பகங்கள் தொடங்குவதாகவும், உரிய அனுமதி இல்லாமல் செயல்படும் இடங்களை கண்டறிந்து தேவையான அங்கீகாரம் பெற அறிவுறுத்தும் பணிகள் நடைபெறுவதாகவும் அதிகாரிகள் தெரிவித்தனர்.
காப்பகங்களின் எண்ணிக்கை உயர்வதை கட்டடங்கள் அல்லது நிறுவனங்கள் அதிகரிப்பதாக மட்டும் பார்க்க முடியாது என்றும் அதிகாரிகள் சுட்டிக்காட்டினர். ஒரு காப்பகத்தில் சராசரியாக 30 முதல் 40 முதியவர்கள் வரை தங்குவதால், மக்கள் தொகையில் முதியவர்களின் பங்கு உயர்வதையும் இது காட்டுகிறது.
இதன் பின்னணியில், குடும்பங்கள் முதியவர்களை எவ்வாறு பராமரிக்கின்றன, தேவையான மருத்துவ உதவி கிடைக்கிறதா, சமூக ஆதரவு எந்த அளவுக்கு உள்ளது போன்ற கேள்விகள் மீண்டும் முன்வருகின்றன. சமூக நலம் மற்றும் மகளிர் உரிமைத்துறை அதிகாரிகள், அடல் வயோ அப்யுதய் யோஜனா திட்டத்தின் கீழ் பள்ளி, கல்லூரிகளில் முதியோர் பராமரிப்பு குறித்த விழிப்புணர்வு தொடர்ந்து ஏற்படுத்தப்படுவதாக தெரிவித்தனர்.
