புதுடில்லி: ஜம்மு-காஷ்மீர் விவகாரம் தொடர்பாக இஸ்லாமிய நாடுகளின் கூட்டமைப்பான ஓ.ஐ.சி. நிறைவேற்றிய தீர்மானத்தை இந்திய வெளியுறவு அமைச்சகம் நிராகரித்துள்ளது. அந்த தீர்மானம் பாரபட்சமானதும், ஒருதலைப்பட்சமானதும், உண்மைக்கு புறம்பானதுமாக இருப்பதாக அமைச்சகம் தெரிவித்தது.
மேற்காசிய நாடான ஈராக் தலைநகர் பாக்தாதில் சமீபத்தில் நடந்த ஓ.ஐ.சி. வெளியுறவு அமைச்சர்கள் மாநாட்டில் இந்த தீர்மானம் நிறைவேற்றப்பட்டது. இதில், அரசியலமைப்பின் 370வது பிரிவை நீக்கிய நடவடிக்கையை திரும்பப் பெற வேண்டும் எனவும் குறிப்பிடப்பட்டதாக கூறப்படுகிறது.
இதற்கு பதிலளித்த வெளியுறவு அமைச்சகம், இந்த தீர்மானங்கள் “தீங்கிழைக்கும் நோக்கத்துடன்” உருவாக்கப்பட்டவை என்றும், பாகிஸ்தான் தனது குறுகிய மற்றும் பாரபட்சமான இலக்குகளுக்காக ஓ.ஐ.சி. அமைப்பை திட்டமிட்டு தவறாக பயன்படுத்துகிறது என்றும் குற்றம்சாட்டியது. இவ்வாறு பயன்படுத்த அனுமதிக்கப்பட்டது ஏமாற்றம் அளிப்பதாகவும் தெரிவித்தது.
மேலும், இந்தியாவின் உள்விவகாரங்களில் கருத்து தெரிவிக்க ஓ.ஐ.சி.க்கு எந்த உரிமையும் இல்லை என்றும், ஜம்மு-காஷ்மீர் மற்றும் லடாக் யூனியன் பிரதேசங்கள் இந்தியாவின் ஒருங்கிணைந்த பகுதிகள் என்றும் அமைச்சகம் வலியுறுத்தியது. அரசியல் உள்நோக்கமுள்ள பிரசாரங்களால் இந்த உண்மையை மாற்ற முடியாது என்றது.
370வது பிரிவு நீக்கப்பட்ட பின்னர் ஜம்மு-காஷ்மீரில் உள்கட்டமைப்பு மேம்பாடு ஏற்பட்டதாகவும், சுற்றுலா மற்றும் போக்குவரத்து இணைப்பு உள்ளிட்ட துறைகளில் குறிப்பிடத்தக்க பொருளாதார வளர்ச்சி காணப்படுவதாகவும் அமைச்சகம் கூறியது. இதற்கு மாறாக, பாகிஸ்தான் ஆக்கிரமிப்பு ஜம்மு-காஷ்மீரில் பொதுமக்கள் மீது வன்முறை மற்றும் அடக்குமுறை நடந்ததாகவும், இந்தியாவுக்கு எதிரான குற்றச்சாட்டுகள் மூலம் பாகிஸ்தான் தனது நாட்டில் சிறுபான்மையினர் மீதான துன்புறுத்தல்கள் மற்றும் மத ரீதியான வன்முறைகள் குறித்த சர்வதேச கவனத்தை திசைதிருப்ப முயல்கிறது என்றும் குற்றம்சாட்டியது.
