புதுடில்லி: காங்கிரஸ் எம்பி ராகுல் காந்தி வெளிநாடு பயணங்கள் மேற்கொள்வது குறித்து அரசியல் விமர்சனங்கள் எழுவது வழக்கம். இந்நிலையில், அவர் வியட்நாம் செல்ல உள்ளதாக தகவல் வெளியானதைத் தொடர்ந்து புதிய சர்ச்சை உருவானது.
பாஜ சமூக ஊடகத்தில் விமானத்தில் அவர் பயணிப்பது போன்ற வீடியோவை வெளியிட்டு, “பொய் பரப்புவதில் சோர்வடைந்து சில நாட்கள் வியட்நாம் செல்கிறேன்” என்ற பொருளில் கிண்டலான பதிவை பகிர்ந்தது. பாஜ செய்தித்தொடர்பாளர் ஆர்பி சிங், ராகுல் அரசியல் நிகழ்ச்சிகளுக்குப் பிறகு வெளிநாட்டில் நீண்ட இடைவெளி எடுத்துக்கொள்வதாகவும், முன்பும் வியட்நாம் சென்றிருக்கலாம் என்றும் குற்றம்சாட்டினார்.
பாஜ தலைவர் ஷாஜியா இல்மி, “ஓட்டுத் திருட்டு” விவகாரம் ஒரு சாக்குப்போக்கு மட்டுமே என கூறி, ராகுல் தொடர்ந்து வேலை செய்ய முடியாமல் மீண்டும் சுற்றுலா தொடங்கியதாக விமர்சித்தார்; இந்த முறை அவர் வியட்நாம் சென்றுள்ளதாகவும் தெரிவித்தார்.
இதற்கு காங்கிரஸ் தரப்பில் சந்தீப் தீக்சித் பதிலளிக்கையில், யார் எங்கு சென்றால் என்ன என்ற கேள்வியை எழுப்பி, வெளிநாடு செல்லுவது அசாதாரணம் அல்ல என்றார். எதிர்க்கட்சி தலைவர் என்ற வகையில் ராகுலுக்கு கடமைகள் உள்ளன என்றும், யேல் பல்கலை மாணவர்களுடன் கலந்துரையாடியது, லண்டனில் மாணவர்கள் மற்றும் கல்வியாளர்களை சந்தித்தது, பத்திரிகையாளர்களை சந்தித்தது போன்ற செயல்பாடுகளை குறிப்பிட்டார்.
மேலும், லோக்சபா கூடும் போது பிரதமர் வெளிநாடு செல்லக்கூடாது என்ற பாரம்பரியத்தை முன்பு பின்பற்றியதாகவும், அது பின்னர் உடைக்கப்பட்டபோது அதே அளவிலான கேள்விகள் எழவில்லை என்றும் தீக்சித் கூறினார்.
