பிரான்ஸ் உள்ளிட்ட நாடுகளில் போராட்டங்கள் அமைதியாக தொடங்கி பின்னர் தீ வைப்பு, கொள்ளை போன்ற வன்முறையாக மாறிய நிகழ்வுகளை சுட்டிக்காட்டி, ‘கரப்பான் கட்சி’ என குறிப்பிடப்பட்ட அமைப்புக்கு டெல்லி உயர் நீதிமன்றம் புதன்கிழமை கடுமையான எச்சரிக்கை விடுத்தது. சட்டப்படி நடைபெறும் போராட்டத்தை தடுக்க போலீசுக்கு நோக்கம் இல்லை; தாக்குதல் மற்றும் வன்முறை போன்ற அசம்பாவிதங்களைத் தடுப்பதற்காகவே போலீஸ் தலையீடு என நீதிமன்றம் விளக்கமளித்தது.
தலைமை தேர்தல் கமிஷனர் ஞானேஷ் குமார் பதவி விலக வேண்டும் எனக் கோரி, கடந்த அக்டோபர் 10-ம் தேதி போராட்டத்திற்கு அந்தக் கட்சி அழைப்பு விடுத்தது. ஜந்தர் மந்தரில் தலைவர்கள் கூடுவதற்கு முன்பே அவர்கள் கைது செய்யப்பட்ட நிலையில், பொதுஅமைதிக்கு பங்கம் விளைவிக்கும் வகையில் அடுத்த ஓராண்டு போராட்டம் நடத்தக் கூடாது என்ற உத்தரவாத பத்திரம் பெற்ற பிறகு விசாரணை நீதிமன்றம் அவர்களை விடுவித்ததாக கூறப்படுகிறது.
இதன் பின்னர் ஜந்தர் மந்தர் பகுதியை அரசு போராட்டக் கள பட்டியலில் இருந்து நீக்கியதாகவும், அதையடுத்து அசுதோஷ் ரன்கா மற்றும் சவுரவ் தாஸ் ஆகியோர் தடையை மீறி தடுப்புகளை கடந்து போராட முயன்றதாகவும் வழக்கில் குறிப்பிடப்பட்டது. இதற்காக இருவரும் அக்டோபர் 13-ம் தேதி மீண்டும் கைது செய்யப்பட்டு நீதிமன்ற காவலில் வைக்கப்பட்டனர்; பின்னர் காவல் நீட்டிக்கப்பட்ட நிலையில் புதன்கிழமை மீண்டும் விசாரணை நீதிமன்றத்தில் ஆஜர்படுத்தப்பட்டனர்.
காவல் நீட்டிப்பு உத்தரவை எதிர்த்து தாக்கல் செய்யப்பட்ட மனுவை விசாரித்த நீதிபதி சுப்ரமணியம், உத்தரவாதம் அளித்த பின்னரும் தடையை மீறி உள்ளே நுழைந்தது சட்டவிரோதம் அல்லவா என கேள்வி எழுப்பினார். தடுப்புகளை உடைத்து செல்லும் செயல் மற்றவர்களையும் சட்டத்தை மீற தூண்டக்கூடும்; மேலும் அமைதியான போராட்டத்தில் அந்நிய நபர்கள் புகுந்து வன்முறையை உருவாக்கினால் அது ஏற்பாட்டாளர்களின் பெயருக்கு களங்கமாகும் என்றும் நீதிமன்றம் குறிப்பிட்டது.
மேலும், விசாரணை நீதிமன்றத்தில் நிவாரணம் கோரக்கூடிய வழிகள் இருக்கும்போது அரசியல் சாசனத்தின் 226-வது பிரிவின் கீழ் உயர் நீதிமன்றத்தை அணுகியது ஏன் எனவும் நீதிபதி கேள்வி எழுப்பினார். பிற்பகலில் விசாரணை நீதிமன்றம் எடுக்கும் முடிவை பார்த்த பின் அடுத்த சட்ட நடவடிக்கையை மேற்கொள்ளலாம் என கூறிய நிலையில், இருவரின் தரப்பு வழக்கறிஞர் மனுவை திரும்ப பெறுவதாக தெரிவித்தார்; ரன்கா 31 வயதும், தாஸ் 26 வயதும் என நீதிமன்றத்தில் தெரிவிக்கப்பட்டது.
