விலைவாசி உயர்வும், பள்ளிகளில் நிலவும் மோசமான நிலைமைகளும் காரணமாக பிரான்சில் போராட்டங்கள் நடைபெற்று வருகின்றன. சில இடங்களில் அவை வன்முறையாக மாறியதாக தெரிவிக்கப்பட்டுள்ளது.
இந்நிலையில், ஒரு பிரசார கூட்டத்தில் பேசிய அமெரிக்க அதிபர் டொனால்ட் டிரம்ப், பிரான்ஸ் “முஸ்லிம்களின் நாடாக மாறி வருகிறது” என கூறி, அந்த நாடு முதலில் எல்லைகளை மூட வேண்டும் என்றும், வெளிநாட்டினர் குவிவதை தடுக்க வேண்டும் என்றும் தெரிவித்தார்.
இதற்கு பிரான்ஸ் அதிபர் இமானுவேல் மேக்ரான் கடுமையாக எதிர்வினையாற்றினார். பிரான்சில் உள்ள சில பிரச்னைகளையும் பதற்றமான சூழ்நிலையையும் சில வெளிநாட்டு தலைவர்கள் தங்கள் அரசியல் நோக்கங்களுக்கு பயன்படுத்த முயல்கிறார்கள்; அதற்காக பொய்யான தகவல்களை பரப்பி பிரச்னையை தீவிரப்படுத்த முயல்கிறார்கள் என்றார்.
மேலும், பிற நாடுகளில் நடைபெறும் தேர்தல் போன்ற அரசியல் காரணங்களுக்காக இவ்வாறு பேசப்படுவதாகவும், டிரம்ப் கூறுவது போல பிரான்சில் முஸ்லிம்கள் அதிக அளவில் இல்லை என்றும் மேக்ரான் கூறினார். குடியேற்றப் பிரச்னைக்கும் தற்போதைய போராட்டங்களுக்கும் தொடர்பில்லை என்றும் அவர் வலியுறுத்தினார்.
சமூக வலைதளங்களில் ஏ.ஐ. (செயற்கை நுண்ணறிவு) மூலம் உருவாக்கப்பட்ட போலிப் படங்கள் உள்ளிட்ட தவறான தகவல்கள் பரப்பப்படுவதாகவும், ஏற்க முடியாத இத்தகைய பேச்சுகளுக்கு பதிலளிக்க வேண்டிய நிலை ஏற்பட்டுள்ளதாகவும் மேக்ரான் தெரிவித்தார்.
