புதுடில்லி: காங்கிரஸ் மூத்த தலைவர் சோனியா காந்தி, ராஜிவ் காந்தியை முதன்முறையாக சந்தித்த தருணத்தை நினைவு கூரும் வீடியோவை வெளியிட்டுள்ளார். இந்த வீடியோ இணையத்தில் பரவலாக கவனம் பெற்றுள்ளது.
இந்த வீடியோ, அவர் வெளியிட உள்ள சுயசரிதை நூல் Belonging; A Journey of Love என்பதற்கான முன்னோட்டமாக வெளியாகியுள்ளது. இந்த நூல் 2026 நவம்பர் 10-ஆம் தேதி வெளியாகும் என்றும், ஹார்பர் காலின்ஸ் நிறுவனம் இதை வெளியிடுகிறது என்றும் தெரிவிக்கப்பட்டுள்ளது.
எக்ஸ் தளத்தில் பகிரப்பட்டுள்ள 2 நிமிட வீடியோவில், இங்கிலாந்தின் கேம்பிரிட்ஜில் தனது வாழ்க்கையின் தொடக்க கால நாட்களை சோனியா நினைவு கூர்கிறார். இத்தாலிய உணவுகள் கிடைக்கும் இடங்களைத் தேடியபோது கண்டுபிடித்த ஒரு சிறிய கிரேக்க உணவகத்தில்தான் தனது “அன்பின் பயணம்” தொடங்கியதாக அவர் கூறுகிறார்.
அந்த உணவகத்தில் ஐரோப்பிய மாணவர்களுடன் பல இந்திய மாணவர்களும் இருந்ததாகவும், பொதுவான நண்பர் வழியாக அங்கேதான் ராஜிவை முதன்முறையாக சந்தித்ததாகவும் அவர் நினைவுபடுத்துகிறார். பின்னர் இருவரும் நண்பர்களாகி, நண்பர்கள் குழுவுடன் விருந்துகள் மற்றும் சுற்றுலா போன்ற நிகழ்வுகளில் கலந்து கொண்டதாகவும், ராஜிவின் மென்மையான இயல்பே தன்னை ஈர்த்ததாகவும், அந்த முதல் சந்திப்பை மறக்க முடியாது என்றும் அவர் கூறுகிறார்.
மேலும், அன்பு, மகிழ்ச்சி மற்றும் நினைவுகள் நிறைந்த அந்த உலகத்தை நவம்பர் 10-ஆம் தேதி வெளியாகும் நூல் மூலம் வாசகர்களுடன் பகிர்வதாகவும் சோனியா தெரிவிக்கிறார்.
