வேலூர் மாவட்டத்தில் ஓய்வுபெற்ற ராணுவ அதிகாரி ஒருவர், வாட்ஸ்அப் மூலம் ராணுவத்தின் முக்கிய தகவல்களை பகிர்ந்ததாகக் கூறப்படும் விவகாரத்தில் கைது செய்யப்பட்டுள்ளதாக போலீசார் தெரிவித்தனர்.
கணியம்பாடி அருகே கீழ்வல்லம் கிராமத்தைச் சேர்ந்த பாபு (52), ராணுவத்தில் சுமார் 28 ஆண்டுகள் பல்வேறு பிரிவுகளில் பணியாற்றியவர். கடந்த ஆண்டு ராணுவ தளவாடப் பிரிவில் கேப்டனாக பணியாற்றி ஓய்வு பெற்றுள்ளார்.
பாபு, வாட்ஸ்அப்பில் ஒரு பெண்ணுக்கு ராணுவ தளவாடங்கள் தொடர்பான ரகசிய தகவல்களை அனுப்பியதாக விசாரணையில் தெரிய வந்ததாக போலீசார் கூறினர். ராணுவத்திற்குள் விசாரித்து தகவல்களை சேகரித்து, சுமார் ஓராண்டாக அந்த பெண்ணுக்கு அனுப்பி வந்ததாகவும் குற்றச்சாட்டு உள்ளது.
இந்த நடவடிக்கை ராணுவ உளவுப்பிரிவினரால் கண்டறியப்பட்டதைத் தொடர்ந்து, அதிகாரிகள் அவரை வேலூர் தாலுகா காவல் நிலையத்திற்கு அழைத்துச் சென்று விசாரித்தனர். விசாரணை முடிந்த பின்னர் அவர் வேலூர் தாலுகா போலீசாரிடம் ஒப்படைக்கப்பட்டு, இன்று காலை கைது செய்யப்பட்டார்.
மேலும் மத்திய அரசின் உளவுத்துறை அதிகாரிகளும் அவரிடம் விசாரணை நடத்தியுள்ளதாக போலீசார் தெரிவித்தனர். அவர் தொடர்பில் இருந்த பெண் யார், எந்த நாட்டைச் சேர்ந்தவர் என்பதற்கான முழு விவரங்கள் இன்னும் தெரியவில்லை; தொடர்ந்து விசாரணை நடைபெற்று வருகிறது.
