பீஹாரில் நடந்த காங்கிரஸ் பொதுக்கூட்டத்தில் கட்சித் தலைவர் மல்லிகார்ஜுன் கார்கே, பிரதமர் நரேந்திர மோடி அரசை விமர்சிக்கும் போது மோடியின் தந்தையை குறிப்பிடும் வகையில் பேசியதாக கூறி, அதற்கு எதிராக பாஜ நாடு முழுதும் போராட்டங்களை நடத்தியது.
பாதுகாப்புத் துறை அமைச்சர் ராஜ்நாத் சிங் வெளியிட்ட அறிக்கையில், இந்த பேச்சு “வருத்தம் அளிக்கிறது” என்று கூறினார். இது சாதாரண தொண்டர் அல்லது இளம் தலைவர் பேசியது அல்ல; நாட்டின் பழமையான கட்சியின் தலைவர் என சொல்லப்படுபவர் பேசியதாகவும், தவறை உணர்ந்து மன்னிப்பு கேட்பதற்கு பதிலாக அதை நியாயப்படுத்த முயன்றதாகவும் அவர் குற்றம்சாட்டினார்.
மத்திய அமைச்சர் பிரஹலாத் ஜோஷி, மறைந்த பெற்றோரைப் பற்றிய குறிப்புகள் அரசியல் விமர்சனத்தில் இடம் பெறக் கூடாது என கூறி, காங்கிரஸ் தலைமையை கடுமையாக விமர்சித்தார். இது கட்சிக்குள் உள்ள விரக்தியை காட்டுவதாகவும் அவர் தெரிவித்தார்.
இதற்கு பதிலளித்த காங்கிரஸ், கடந்த காலங்களில் சோனியா காந்தி மற்றும் கார்கே குறித்து மோடியும், அமித் ஷாவும் கடுமையாக விமர்சித்ததாக கூறியது.
கார்கே மன்னிப்பு கேட்கவும் பதவி விலகவும் வேண்டும் என வலியுறுத்தி பல மாநிலத் தலைநகரங்களில் பாஜ ஆர்ப்பாட்டம் நடத்தியதாக தகவல்கள் தெரிவிக்கின்றன. பீஹாரில் கார்கே உருவபொம்மை எரிக்கப்பட்டதாகவும், ஜம்மு காஷ்மீரில் போஸ்டர்கள் எரித்து கோஷமிட்டதாகவும், பெங்களூருவில் சுதந்திர பூங்காவில் போராட்டம் நடந்ததாகவும் கூறப்படுகிறது.
