விஜயதசமி மற்றும் அமைப்பின் 100 ஆண்டு நிறைவை முன்னிட்டு, தமிழகம் முழுவதும் ஆர்.எஸ்.எஸ். சார்பில் அணிவகுப்பு ஊர்வலங்கள் மற்றும் பொதுக்கூட்டங்கள் நடைபெற்றன. மாநிலம் முழுவதும் 100க்கும் மேற்பட்ட இடங்களில் நிகழ்ச்சிகள் நடந்ததாகவும், மாவட்டத் தலைமையகங்கள் மற்றும் முக்கிய நகரங்கள் உள்ளிட்ட 45க்கும் மேற்பட்ட இடங்களில் அணிவகுப்புகள் நடைபெற்றதாகவும் தெரிவிக்கப்பட்டது.
சென்னையில் எழும்பூர், திருவொற்றியூர், கொளத்தூர், கொரட்டூர், அய்யப்பன்தாங்கல், மேடவாக்கம், குரோம்பேட்டை உள்ளிட்ட பகுதிகளில் அணிவகுப்புகள் நடந்தன. சில இடங்களில் கனமழையிலும் ஊர்வலம் தொடர்ந்ததாகவும், சில பகுதிகளில் பங்கேற்பாளர்களை மக்கள் மலர் தூவி வரவேற்றதாகவும் கூறப்பட்டது.
எழும்பூரில் ரமடா ஹோட்டல் அருகே மாலை 4 மணியளவில் தொடங்கிய அணிவகுப்பு ராஜரத்தினம் மைதானத்தில் நிறைவடைந்தது. அதனைத் தொடர்ந்து நடைபெற்ற பொதுக்கூட்டத்தில் ‘ஸ்ரீ ராமகிருஷ்ண விஜயம்’ இதழின் ஆசிரியர் சுவாமி அபவர்கானந்த மஹராஜ் சிறப்பு விருந்தினராக கலந்து கொண்டு ஆசியுரை வழங்கினார்.
கூட்டத்தில் பேசிய ஆர்.எஸ்.எஸ். தென்பாரத செயற்குழு உறுப்பினர் ஆனந்த் ரகுநாதன், நாட்டையும் ஆர்.எஸ்.எஸ். அமைப்பையும் தோற்கடிக்க சில சக்திகள் சதி செய்கின்றன என கூறினார். அதே நேரத்தில், எதிர்ப்பவர்கள் கூட ஒருநாள் அமைப்பை ஏற்றுக்கொள்ளும் நிலை வரும் எனவும், ஹிந்துக்கள் ஒன்றுபட வேண்டும் என்றும், நாடு அனைத்து துறைகளிலும் முன்னேற வேண்டும் என்ற நோக்குடன் அமைப்பு தொடங்கப்பட்டு 100 ஆண்டுகளாக அதே இலக்குடன் செயல்படுகிறது என்றும் அவர் தெரிவித்தார்.
