திருச்சி கிழக்கு உள்ளிட்ட ஐந்து சட்டசபை தொகுதிகளுக்கான இடைத்தேர்தல்கள் முடிந்ததும், வரவிருக்கும் உள்ளாட்சித் தேர்தலை எதிர்கொள்ள தவெக தயாராகி வருகிறது. அதில், கூட்டணி கட்சிகளுக்கு 15% இடங்களை ஒதுக்கி, மீதமுள்ள 85% இடங்களில் தவெகவே நேரடியாக போட்டியிடும் வியூகம் பரிசீலனையில் இருப்பதாக கட்சி வட்டாரங்கள் தெரிவிக்கின்றன.
தாராபுரம், மதுராந்தகம் இடைத்தேர்தல்களில் பெற்ற வெற்றியின் தொடர்ச்சியாக, திருச்சி கிழக்கு, விராலிமலை, கரூர், பெருந்துறை, அம்பாசமுத்திரம் ஆகிய தொகுதிகளின் இடைத்தேர்தல்களிலும் வெற்றியை தக்கவைக்க தவெக தலைமையகம் திட்டமிட்டுள்ளதாக கூறப்படுகிறது. உள்ளாட்சி தேர்தல் முடிவுகள் கிராமப்புறம் வரை பெண்கள், தொழிலாளர்கள், இளைஞர்கள் உள்ளிட்ட பல தரப்பினரிடையே கட்சிக்கு உள்ள ஆதரவை வெளிப்படுத்தும் என்பதால், அதிகபட்ச இடங்களில் தவெகவே களமிறங்க விரும்புகிறது.
தகவலின்படி, மீதமுள்ள 15% இடங்கள் காங்கிரஸ், விடுதலை சிறுத்தைகள் கட்சி, முஸ்லிம் லீக் உள்ளிட்ட கூட்டணி கட்சிகளுக்கு வழங்கப்படலாம். ஆனால் கூட்டணி கட்சிகள் அதிக இடங்களும் மேயர் பதவிகள் போன்ற முக்கிய பொறுப்புகளும் எதிர்பார்ப்பதாகவும், இதனால் 15% சூத்திரத்திற்கு ஒப்புதல் பெற அமைச்சர்கள் மற்றும் மூத்த நிர்வாகிகள் பேச்சுவார்த்தை நடத்த முடிவு செய்துள்ளதாகவும் கூறப்படுகிறது.
தவெக நிர்வாகிகள் கூறுகையில், வலுவான அமைப்பு கொண்ட திமுக, அதிமுக ஆகியவற்றை எதிர்கொள்ளும் வகையில் வேட்பாளர் தேர்வு செய்யப்படும் என தெரிவித்தனர். அமைச்சர்கள், எம்.எல்.ஏ.க்கள், மாவட்ட செயலர்கள் ஆகியோர் உள்ளாட்சி தேர்தல் பணிக்கு பொறுப்பேற்க உள்ளதாகவும், வெற்றி வாய்ப்புள்ள இடங்களின் விவரங்கள் சேகரிக்கப்படுவதாகவும் கூறப்படுகிறது.
மேலும், கட்சிக்காக உழைத்தவர்கள் மற்றும் உள்ளூர் அளவில் செல்வாக்கு கொண்டவர்களுக்கு முன்னுரிமை அளிக்கப்படும் என்றும், சட்டசபை தேர்தலைப் போல முதல்வர் விஜயின் செல்வாக்கை மட்டும் நம்பி உள்ளாட்சி தேர்தலில் வெற்றி பெற முடியுமா என்ற சந்தேகத்தால் மக்களுடன் நேரடி தொடர்பு கொண்டவர்களை வேட்பாளர்களாக தேர்வு செய்ய முடிவு செய்யப்பட்டுள்ளதாகவும் அவர்கள் தெரிவித்தனர்.
