இந்தியாவின் உள்நாட்டு வழிகாட்டி அமைப்பான ‘நேவிக்’ (NavIC), NVS-03 செயற்கைக்கோள் தனது இலக்கு சுற்றுப்பாதையை வெற்றிகரமாக அடைந்ததைத் தொடர்ந்து மீண்டும் முழுமையாகச் செயல்படத் தொடங்கியுள்ளது. இதன் மூலம் விண்வெளி தொழில்நுட்பத்தில் இந்தியா மேலும் ஒரு முக்கிய மைல்கல்லை எட்டியுள்ளது.
அமெரிக்காவின் ஜிபிஎஸ் அமைப்பைச் சார்ந்திருக்காமல், இந்தியா தனது சொந்த பிராந்திய வழிகாட்டுதல் தொழில்நுட்பமான ‘நேவிக்’ அமைப்பை உருவாக்கிப் பயன்படுத்தி வருகிறது. ஆனால், முந்தைய தலைமுறை செயற்கைக்கோள்களில் ஏற்பட்ட அணுக்கடிகாரப் பழுது மற்றும் தொழில்நுட்பக் கோளாறுகளால், துல்லியமான சேவையை வழங்குவதில் நீண்டகாலம் தாமதம் ஏற்பட்டது.
ஆந்திர மாநிலம் ஸ்ரீஹரிகோட்டாவில் உள்ள சதீஷ் தவான் விண்வெளி மையத்திலிருந்து ஜிஎஸ்எல்வி-எஃப்18 ராக்கெட் மூலம், சுமார் 2,232 கிலோ எடையுள்ள அதிநவீன NVS-03 செயற்கைக்கோள் ஏவப்பட்டது. புவி ஒத்திசைவு பரிமாற்றச் சுற்றுப்பாதையில் நிலைநிறுத்தப்பட்ட பின், இஸ்ரோ விஞ்ஞானிகள் தொடர் உந்துவிசை இயந்திர செயல்பாடுகள் மூலம் அதனை நிர்ணயிக்கப்பட்ட புவிசார் சுற்றுப்பாதைக்குக் கொண்டு சென்றனர்.
வெளிநாட்டு கடிகாரத் தொழில்நுட்பத்தைச் சார்ந்திருப்பதைத் தவிர்க்க, முழுக்க இந்தியாவிலேயே வடிவமைக்கப்பட்ட ரூபிடியம் அணுக்கடிகாரம் இதில் பொருத்தப்பட்டுள்ளது. வழக்கமான எல்5 மற்றும் எஸ் அலைவரிசைகளுடன் புதிதாக எல்1 அலைவரிசையும் சேர்க்கப்பட்டுள்ளதால், பொதுமக்களின் ஸ்மார்ட்போன்கள் மற்றும் பொது வழிகாட்டுச் சாதனங்களில் ‘நேவிக்’ சேவையை எளிதாகப் பயன்படுத்த முடியும்.
இந்த உள்நாட்டு அமைப்பு ராணுவப் பாதுகாப்பு, விமானம், கடல்சார் போக்குவரத்து, பேரிடர் மேலாண்மை உள்ளிட்ட முக்கியத் துறைகளுக்குப் பெரிதும் பயன்படும். அடுத்து ஏவப்படவுள்ள NVS-04 மற்றும் NVS-05 செயற்கைக்கோள்களும் செயல்பாட்டுக்கு வரும்போது, இந்தியாவின் ‘தேசி ஜிபிஎஸ்’ மேலும் துல்லியமாகவும் வலிமையாகவும் மாறும் என இஸ்ரோ விஞ்ஞானிகள் நம்பிக்கை தெரிவித்துள்ளனர்.
