அமெரிக்காவின் லாஸ் ஏஞ்சலஸ் நகர மேயர் தேர்தலில், இந்தியாவில் பிறந்த நகர சபை உறுப்பினர் நித்யா ராமன் வெற்றி பெற்றுள்ளார். தற்போதைய மேயர் கரேன் பாஸை அவர் தோற்கடித்தார். நவம்பர் 3 அன்று நடந்த தேர்தலுக்குப் பிறகு, நவம்பர் 5 வியாழக்கிழமை ராமனைத் தொலைபேசியில் அழைத்து பாஸ் தோல்வியை ஒப்புக்கொண்டார்.

எண்ணப்பட்ட வாக்குகளில் ராமன் சுமார் 51 முதல் 52 சதவீதமும், பாஸ் சுமார் 48 சதவீதமும் பெற்றிருந்தனர். 45 வயதான ராமன், டெமாக்ரடிக் சோஷலிஸ்ட்ஸ் ஆஃப் அமெரிக்கா அமைப்புடன் தொடர்புடையவர். 1981-ல் கேரளாவில் பிறந்த அவர், ஆறு வயதில் அமெரிக்கா சென்றார். ஹார்வர்ட் பல்கலைக்கழகத்தில் பட்டம் பெற்ற அவர், எம்.ஐ.டி-யில் நகர்ப்புறத் திட்டமிடலில் முதுநிலைப் பட்டம் முடித்தார்.

கடைசி நேரப் போட்டி

2020 முதல் நகர சபையில் உறுப்பினராக இருக்கும் ராமன், அந்த அமைப்புடன் தொடர்புடைய முதல் நகர சபை உறுப்பினர் ஆவார். பாஸின் மறுதேர்வுக்கு ஆதரவு தெரிவித்த சிறிது காலத்திலேயே, வேட்புமனு தாக்கல் முடிய சில மணி நேரம் இருந்தபோது அவர் மேயர் போட்டியில் இறங்கினார். இது, பாஸைச் சுற்றித் திரண்டிருந்த நகரின் ஜனநாயகக் கட்சி தலைமையை அதிருப்தியடையச் செய்தது.

உடைந்த தெருவிளக்குகள், சேதமடைந்த நடைபாதைகளை நகர நிர்வாகத்தின் தோல்விகளாகச் சுட்டிக்காட்டி “பள்ளம் அரசியல்” என்ற பெயரில் அவர் பிரசாரம் செய்தார். வாழ்க்கைச் செலவு குறித்த இளம் வாக்காளர்களின் கோபத்தையும் அவர் எடுத்துப் பேசினார். வாடகையைக் குறைப்பது, சாலைகளை மேம்படுத்துவது, வீடற்றோர் எண்ணிக்கையைக் குறைப்பது, மக்களின் பாதுகாப்பை உறுதி செய்வது ஆகியவற்றையும் வாக்குறுதியாக அளித்தார். பாலிசேட்ஸ் காட்டுத்தீயில் வீட்டை இழந்து போட்டியிட்ட முன்னாள் ரியாலிட்டி டிவி பிரபலமும் குடியரசுக் கட்சிக்காரருமான ஸ்பென்சர் பிராட்டை முதல் சுற்றில் ராமன் குறுகிய வித்தியாசத்தில் வென்றார். பின்னர் உள்ளூர் டெமாக்ரடிக் சோஷலிஸ்ட் அமைப்பு அவருக்கு ஆதரவளித்து, ஏராளமான தன்னார்வலர்களைக் களமிறக்கியது.

73 வயதான பாஸ், 2022-ல் லாஸ் ஏஞ்சலஸின் முதல் கறுப்பினப் பெண் மேயராகத் தேர்ந்தெடுக்கப்பட்டவர். 2025 காட்டுத்தீயைக் கையாண்ட விதம், வீடற்றோர் பிரச்சினை, வீட்டுச் செலவு, பெரும் பட்ஜெட் பற்றாக்குறை ஆகியவை அவரது பதவிக்காலத்தில் விமர்சனத்துக்கு உள்ளாயின.

எதிர்வினைகள்

“இது நாங்கள் எதிர்பார்த்த முடிவு அல்ல; ஆனால் லாஸ் ஏஞ்சலஸ் மக்கள் தங்கள் தீர்ப்பைச் சொல்லிவிட்டனர்” என்று பாஸ் தெரிவித்தார். ராமனுக்கு வாழ்த்துத் தெரிவித்ததாகவும், அதிகார மாற்றம் சுமுகமாக நடைபெறும் என்றும் அவர் கூறினார்.

மேயராகத் தேர்ந்தெடுக்கப்பட்டதைப் பெருமையாகக் கருதுவதாகக் கூறிய ராமன், தாம் இந்த நகரை நேசிப்பதாகவும் அதன் மக்கள் மீது நம்பிக்கை வைத்திருப்பதாகவும், முன்னால் உள்ள பணி கடினமானது என்றும் தெரிவித்தார். நகருக்காகப் பல ஆண்டுகளை அர்ப்பணித்தவர் என்று பாஸையும் அவர் பாராட்டினார். நியூயார்க் மேயர் சோஹ்ரான் மம்தானியுடன் ராமன் அடிக்கடி ஒப்பிடப்பட்டு வந்தார்.

அமெரிக்க அதிபர் டொனால்ட் டிரம்ப், பெரு நகரங்களில் டெமாக்ரடிக் சோஷலிஸ்ட் தலைமை கடுமையான விளைவுகளை ஏற்படுத்தக்கூடும் என்றும், அவற்றை மாற்றுவது கடினமாகலாம் என்றும் எச்சரித்தார். லாஸ் ஏஞ்சலஸ் தேர்தலில் முறைகேடுகள் நடந்ததாகவும் அவர் குற்றம் சாட்டினார்; ஆனால் அதற்கு ஆதாரம் எதையும் அளிக்கவில்லை.

2028 ஒலிம்பிக் போட்டிகளை நடத்தத் தயாராகி வரும் நகரத்தை இனி ராமன் வழிநடத்துவார்.