டேப்ஸ் விதிமுறைகள் வரும் வரை ஓய்வுபெறுவோருக்கு இடைக்கால ஓய்வூதியம்: அரசு உத்தரவு
மதுரை: ‘உத்தரவாதப்படுத்தப்பட்ட ஓய்வூதியம்’ (டேப்ஸ்) திட்டத்தை நடைமுறைப்படுத்த தேவையான விதிமுறைகள் உருவாகும் வரை, தகுதியுள்ள அரசு ஊழியர் ஓய்வுபெறுவோருக்கு இடைக்கால நிவாரணமாக ஓய்வூதியம் வழங்க தமிழக அரசு உத்தரவிட்டுள்ளது. 2003-ல் பழைய ஓய்வூதியத் திட்டம் ரத்து செய்யப்பட்ட பின்னர் பங்களிப்பு ஓய்வூதியத் திட்டம் (சி.பி.எஸ்.) அமலுக்கு வந்தது. பின்னர் கடந்த தி.மு.க. ஆட்சியின் இறுதியில் டேப்ஸ் திட்டம் அறிவிக்கப்பட்டாலும், அதை செயல்படுத்த தேவையான விரிவான விதிமுறைகள் உருவாக்கப்படவில்லை. 1.1.2026 முதல் ஓய்வு பெற்றவர்களுக்கு சி.பி.எஸ். முறையா அல்லது டேப்ஸ் திட்டமா என்ற குழப்பம் ஏற்பட்ட நிலையில் இந்த இடைக்கால ஏற்பாடு அறிவிக்கப்பட்டுள்ளது. அரசு அலுவலர் ஒன்றியத்தின் கோரிக்கையையும், மே 25-ல் வெளியான செய்தியையும் தொடர்ந்து, புதிய விதிமுறைகள் உருவாகும் வரை இடைக்கால ஓய்வூதிய ஏற்பாடுகளை அறிவித்து 16.6.2026 தேதியிட்ட அரசாணை எண் 111 வெளியிடப்பட்டுள்ளது.
