இந்தியா–வங்கதேச எல்லை வேலி: பிஎஸ்எஃப்-க்கு நிலம் ஒதுக்க மேற்கு வங்க அரசு ஒப்புதல்
மேற்கு வங்கத்தில் இந்தியா–வங்கதேச எல்லைப் பகுதியில் சட்டவிரோத ஊடுருவலைத் தடுக்கும் நோக்கில், எல்லை பாதுகாப்புப் படை (பிஎஸ்எஃப்) வேலி அமைப்பதற்காக நிலம் ஒதுக்க மாநில அரசு ஒப்புதல் அளித்துள்ளது. கொல்கட்டா தலைமைச் செயலகத்தில் முதல்வர் சுவேந்து அதிகாரி தலைமையில் நடைபெற்ற முதல் அமைச்சரவைக் கூட்டத்தில் இந்த முடிவு எடுக்கப்பட்டது. கூட்டத்துக்குப் பிறகு செய்தியாளர்களிடம் பேசிய முதல்வர், ஆண்டுக்கு ரூ.5 லட்சம் வரை காப்பீடு வழங்கும் ‘ஆயுஷ்மான் பாரத்’ மருத்துவக் காப்பீட்டு திட்டத்தில் மாநிலம் முறையாக இணைவதாக தெரிவித்தார். திட்டத்தை உடனடியாக செயல்படுத்த மத்திய சுகாதார அமைச்சகத்துடன் ஒப்பந்தம் செய்ய அதிகாரிகளுக்கு உத்தரவிடப்பட்டுள்ளதாகவும் கூறினார். மேலும், பி.எம். ஜன் ஆரோக்ய யோஜனா, பி.எம். பசல் பீமா யோஜனா, பள்ளி மேம்பாட்டுக்கான பி.எம். ஸ்ரீ திட்டம், கைவினைஞர்களுக்கான பி.எம். விஸ்வகர்மா உள்ளிட்ட மத்திய அரசின் பல நலத்திட்டங்கள் இனி தடையின்றி செயல்படுத்தப்படும் என அவர் தெரிவித்தார். முந்தைய திரிணமுல் காங்கிரஸ் அரசு அரசியல் காரணங்களால் இத்திட்டங்களுக்கு முட்டுக்கட்டை போட்டதாகவும் அவர் குற்றம்சாட்டினார்.
