‘வந்தே மாதரம்’ பாடலுக்கு தேசிய கீதத்துக்கு இணையான அந்தஸ்து: மத்திய அமைச்சரவை ஒப்புதல்
புதுடில்லி: நாட்டின் தேசிய பாடலான ‘வந்தே மாதரம்’ பாடலுக்கு, தேசிய கீதமான **‘ஜன கண மன’**க்கு இணையான அந்தஸ்து வழங்கும் முன்மொழிவுக்கு மத்திய அமைச்சரவை ஒப்புதல் அளித்துள்ளதாக தகவல் வெளியாகியுள்ளது. மேற்கு வங்கத்தைச் சேர்ந்த எழுத்தாளர் பங்கிம் சந்திர சட்டர்ஜி 1875 நவம்பர் 7 அன்று ‘வந்தே மாதரம்’ பாடலை இயற்றினார். சுதந்திரப் போராட்ட காலத்தில் இது போராளிகளுக்கு பெரும் ஊக்கமாக இருந்ததாக கூறப்படுகிறது. பின்னர் 1950 ஜனவரி 24 அன்று இது நாட்டின் தேசிய பாடலாக அதிகாரப்பூர்வமாக ஏற்கப்பட்டது. இந்த பாடல் உருவானதற்கு 150 ஆண்டுகள் நிறைவடைந்ததை முன்னிட்டு சில மாதங்களுக்கு முன் பார்லிமென்டில் சிறப்பு விவாதமும் நடந்தது. இதன் தொடர்ச்சியாக, அரசு மற்றும் பள்ளி நிகழ்ச்சிகளில் தேசிய கீதம் இசைக்கப்படும் முன் ‘வந்தே மாதரம்’ பாடலை கட்டாயம் இசைக்க வேண்டும் என கடந்த பிப்ரவரியில் மத்திய அரசு உத்தரவிட்டதாக தெரிவிக்கப்பட்டது.
