முல்லைப் பெரியாறு அசல் குத்தகை ஆவணங்கள்: RTI கோரிக்கைக்கு கேரளா மறுப்பு
முல்லைப் பெரியாறு அணையின் நீண்டகால குத்தகை ஒப்பந்தத்துடன் தொடர்புடைய அசல் ஆவணங்களை, தகவல் அறியும் உரிமைச் சட்டம் (RTI) கீழ் கேட்டவர்களுக்கு வழங்க முடியாது என்று கேரள அரசு பதிலளித்துள்ளது. சென்னையைச் சேர்ந்த ஜெயகிருஷ்ணன், 1886-ஆம் ஆண்டு திருவிதாங்கூர் மகாராஜா மற்றும் பிரிட்டிஷ் அரசுக்கு இடையே கையெழுத்தான அசல் குத்தகை ஒப்பந்தம், மின்சாரம் தயாரிப்பு தொடர்பாக 1970-இல் செய்யப்பட்ட திருத்தப்பட்ட ஒப்பந்தம் ஆகியவற்றின் அசல் ஆவணங்கள், மேலும் வரைபடங்கள், புகைப்படங்கள் உள்ளிட்ட முக்கிய பதிவுகளை கோரி விண்ணப்பித்திருந்தார். இதேபோல் கேரளாவின் இடுக்கி மாவட்டத்தைச் சேர்ந்த டான் மேத்யூ என்பவரும் விண்ணப்பம் அளித்திருந்தார். இந்த விண்ணப்பங்களை பரிசீலித்த பிறகு, கேரள பொது நிர்வாகத் துறை வெளியிட்ட அதிகாரப்பூர்வ அறிவிப்பில், அசல் ஒப்பந்த ஆவணங்கள் மற்றும் அதனுடன் தொடர்புடைய வரைபடங்களை வெளியிடுவது மாநிலத்தின் பாதுகாப்பு நலன்களை பாதிக்கக்கூடும் என்பதால் வழங்க இயலாது என்று தெரிவித்துள்ளது. மேலும் RTI சட்டம் 8(1)(a) பிரிவின் கீழ், நாட்டின் இறையாண்மை, ஒருமைப்பாடு மற்றும் பாதுகாப்புக்கு பாதிப்பை ஏற்படுத்தக்கூடிய தகவல்களை வெளியிட வேண்டிய அவசியம் இல்லை என்ற விதியை மேற்கோள் காட்டி, இனி இத்தகைய அசல் ஆவணங்கள் யாருக்கும் வழங்கப்படாது என்றும் கூறப்பட்டுள்ளது.
